ازاى تعملى لنفسك تنظيف بشرة بالبخار

طبعا مهم جدا ان كل واحدة فينا تهتم ببشرتها عشان تفضل اشراقة الجمال منورة على وجهها وكمان تمنع ظهور التجاعيد المبكرة
وعشان نتكلم عن طرق العنايه بالبشرة فأحنا عندنا روتين يومى وروتين اسبوعى

احنا هنتكلم عن الروتين الاسبوعى وبعد كدة هقولكم الروتين اليومى
يبقى عشان نتفق :

تنظيف البشرة بالبخار هنعمله مرة كل أسبوع
طيب؟؟؟؟
يه الادوات اللازمة لعمل تنظيف بشرة فى البيت؟
اول حاجة حددى نوع بشرتك....وهاتى منظف وتونر وماسك وسكرب(سنفرة) مناسبين لبشرتك
وجهزى حلة مليانه شوية ميه وحطى فيها ملعقتين ملح طعام وقشرة برتقالة او قشرة ليمونة وحطيها على النار تغلى
اول حاجة هنحط المنظف على الوجه كله ونبتدى بالتدليك كالتالى:
منطقة الذقن من برة جوة بالاصبع السبابه والوسطى من اليدين معا فى نفس الوقت ليلتقوا فى المنتصف
ثم الخدود فى حركات دائريه للخارج وفى اتجاه الاذنين
ثم الانف
طبعا تجنبى منطقة العينين
ثم الجبهه بنفس طريقة الذقن
وافضلى دلكى كده لمدة 5 دقائق
طيب ايه هى فايدة المنظف ده؟.....ده طبعا بيفتح كل المسام بتاعة البشرة ويزيل كل الاوساخ والاتربة المتركمة بداخلها
ماشى ...طب بعد كده هنعمل ايه؟
مش هنغسل المنظف هنسيبه على وشنا ونقوم نعرض بشرتنا للبخار اللى طالع من الميه اللى على النار لحد ما الميه تبتدى تتكثف على وشك وتحسى انه بقى رطب كدة وطبعا ما تنزليش وشك قوى فى البخار عشان بيكون سخن جدا ولو بشرتك حساسة ما تطوليش فى مرحلة البخار دى رطبى وشك بس
وبعد كدة؟
اوعى تنشفى الميه اللى على وشك ولا تغسلى المنظف ولكن حطى عليهم الاسكرب ودلكى بلطف لمده 5 دقايق كمان
طب ايه فايدته؟
بيشيل الجلد الميت اللى فى البشرة فبيساعد على تجديد خلايا البشرة بصورة طبيعية

ودلوقتى بقى ادخلى اشطفى وجهك ونشفى كويس
وروحى اعملى اى حاجة على ما بشرتك ترتاح
وبعد ربع ساعة حطى الماسك وسيبيه لمده تلت ساعه وبعدين انزعيه برفق او اغسليه على حسب طبيعة الماسك
فايدة الماسك:
تغذية البشرة
وبعد كده هنحط التونر
وفايدته انه قابض لمسام البشرة عشان احنا فتحناها بالمنظف فلازم تتقفل عشان ما ترجعش يكن فيها اوساخ ولا اتربه وتعمل مشاكل للبشرة
وبعدين؟؟؟؟؟؟؟؟؟
بصى بقى فى المرايا تشوفى بدر فى ليلة تمامه
بجد حاجه رهييييييييييييييييبة مفعول السحر يا بنات